కేరళలోని నీలా నది (భారతపుళ) ఒడ్డున ఉన్న మలప్పురం జిల్లా తిరునవయలో ‘మహామాఘ మహోత్సవం’ ఘనంగా ప్రారంభమైంది. ఈ ఉత్సవాన్ని కేరళ కుంభమేళాగా కూడా పిలుస్తారు. కేరళ గవర్నర్ రాజేంద్ర అర్లేకర్ ధర్మధ్వజాన్ని ఆవిష్కరించి అధికారికంగా ఈ మహోత్సవానికి శ్రీకారం చుట్టారు.

ఉత్సవంలో భాగంగా తొలి పవిత్ర స్నానం నవముకుంద ఆలయం సమీపంలోని స్నాన ఘాట్‌లో జరిగింది. మాహామండలేశ్వర్ స్వామి ఆనందవనం భారతి మహారాజ్ నేతృత్వంలో ఈ కార్యక్రమం సాగింది. భక్తుల మంత్రోచ్చారణలు, ఆధ్యాత్మిక వాతావరణం మధ్య ఈ స్నానోత్సవం ప్రత్యేక ఆకర్షణగా నిలిచింది.

చరిత్రలోకి మరోసారి మహామాఘం

సుమారు 270 సంవత్సరాల తర్వాత ఈ మహామాఘ మహోత్సవాన్ని పూర్తిస్థాయిలో నిర్వహించడం విశేషంగా భావిస్తున్నారు. ప్రభుత్వ రికార్డుల ప్రకారం కేరళలో కుంభమేళా తరహా మహామాఘ ఉత్సవం చివరిసారిగా 1755లో జరిగినట్లు సమాచారం. ఆ తర్వాత ఇంత విస్తృతంగా ఈ ఉత్సవాన్ని నిర్వహించడం ఇదే తొలిసారి.

ఈ మహోత్సవం ఫిబ్రవరి 3 వరకు కొనసాగనుంది. ఈ కాలంలో భక్తులు పెద్ద సంఖ్యలో నీలా నది తీరానికి తరలివచ్చే అవకాశం ఉందని అధికారులు అంచనా వేస్తున్నారు.

రోజుకు 50 వేల మందికి పైగా భక్తులు

మహామాఘ మహోత్సవానికి కేరళతో పాటు తమిళనాడు, ఇతర రాష్ట్రాల నుంచి కూడా భక్తులు పెద్ద ఎత్తున హాజరవుతున్నారు. ప్రతిరోజూ సుమారు 50 వేల మందికి పైగా భక్తులు నీలా నదిలో పవిత్ర స్నానాలు ఆచరిస్తారని అంచనా. భక్తుల రాకతో తిరునవయ ప్రాంతం ఆధ్యాత్మిక కాంతితో వెలుగొందుతోంది.

ప్రతిరోజూ సాయంత్రం కాశీ నుంచి వచ్చిన పండితుల ఆధ్వర్యంలో నీలా నదికి ప్రత్యేకంగా నీలా హారతి నిర్వహించనున్నారు. ఈ హారతి కార్యక్రమం భక్తులను విశేషంగా ఆకర్షిస్తోంది.

భక్తులకు ప్రత్యేక ఏర్పాట్లు

భక్తుల సౌకర్యార్థం కేరళ ఆర్టీసీ (KSRTC) సుమారు 100 ప్రత్యేక బస్సులను వివిధ ప్రాంతాల నుంచి నడుపుతోంది. భద్రత, వైద్య సేవలు, తాగునీరు, పారిశుధ్యం వంటి ఏర్పాట్లను ప్రభుత్వం పర్యవేక్షిస్తోంది.

ఉత్సవంలో భాగంగా

• ఆధ్యాత్మిక ప్రవచనాలు

• యోగా శిబిరాలు

• సంప్రదాయ యుద్ధకళ కలరిపయట్టు ప్రదర్శనలు

• సాంస్కృతిక కార్యక్రమాలు

వంటి అనేక కార్యక్రమాలు ఏర్పాటు చేసినట్లు నిర్వాహకులు వెల్లడించారు.